Saksgongen i Marknadsrådet

Marknadsrådet mottek klagar frå Forbrukarombodet, Sosial- og helsedirektoratet og Medietilsynet. Etter at sekretariatet til Marknadsrådet mottek ei sak blir partane kontakta med oppfordring om tilsvar.

Dersom ein eller fleire partar ynskjer det er det mogleg å supplera skriftlege merknadar med eit munnleg innlegg i samband med at Marknadsrådet handsamar saka. Ein part kan for Marknadsrådet anten møta sjølv eller med ein representant, til dømes ein advokat.

I dei sakene der partane er til stades held kvar part eit munnleg innlegg og får deretter kommentera innlegget frå motparten. Medlemane i Marknadsrådet har også høve til å stilla spørsmål.

Etter forhandlingane fattar Marknadsrådet eit vedtak med grunngjeving for resultatet. Vedtaket blir så sendt ut til partane.

Ein kan ikkje klaga på eit vedtak frå Marknadsrådet, men ein kan bringa saka inn for dei ordinære domstolane. Sivilombodsmannen kan også uttala seg om vedtaka frå Marknadsrådet.

Dersom ein vil klaga på sakshandsaminga kan ein slik klage fremjast for Barne-, likestillings- og inkluderingsdepartementet. Etter at ein sakshandsamingsklage er avslutta i departementet kan klagen sendast til Sivilombodsmannen for vurdering.